Salta (Salinas Grande, Cachi, Cafayate...)

Salta

Vor guet 2 Wuche simer i Norde vo Argetinie, nach Salta, greist. Mir hei eigetlech daenkt, dass mir hie nume churz verwile, aus Zwueschestopp fuer nach Bolivie zreise. Wo mir ues aber ueber di muegleche Usflugsziel rund um Salta ud Reis nach Bolivie hei informiert, isch ues abgrate worde nach Bolivie zga. D’Opposition in Bolivie het sich vor auem in Sucre gaege Evo Morales ufglehnt, was naer zu bluetige Usenandersetzige gfuehrt het (1 Polizist ghaengt, 3 Demonstrante tot) u dr Evo naer d’Sicherheitschraeft vo Sucre abzoge het. Da mir zytlich sowieso scho chli eng dinne si gsi (wei a Wiehnachte bide Verwandte vom Nicolas si) hei mir entschide, Bolivie z’umga u drfuer dr Norde vo Argentinie chli meh unger d’Lupe znae u hei zwoi 2-taegigi Toure buecht.
Am erschte Tag (Salta - San Antonio de los Cobres, Purmamarca – fuer die wos uf dr Charte wei nacheluege) si mir mit dem Outo ga Schluchte u Canyons (aehnlech wie die i de USA) aluege, hei Paess ueberquert vo 4200m, si stundelang im Altiplano (Hochland, ca. 3500m) duer d'Stepe dueregfahre, hei Kakteenfelder gseh, hei e Haut gmacht ire riesige Sauzwueschti u am Abe imne Doerfli uebernachtet, wo umgae isch gsi vomne 7-farbige Berg. Mir si sehr beidruckt gsi vo dere ungloubliche Vielfaut wo das Land zbiete het. Anmerkung der Redaktion: Nicht alle Tour-Teilnehmer verkrafteten die enormen Hoehenunterschiede und beklagten „kalte Blitze“ in den Beinen...

Am zwoeite Tag (Purmamarcca - Humanhuaca - Jujuy - Salta) hei mir meh so Kaeffer bsuecht mit Maeritstaend u chline Chile (nit zLand sondern z’Gotteshus). Isch nid glich spannend gsi wie dr 1. Tag, aber drfuer d'Heifahrt, da churz nachdaem mir die kargi Baergwaeut, Kakteewueschtini hinger ues gla hei, si mir ine subtropische Regewaud (bis 2500m hoech) inegfahre. Isch no spezieu weme bedaenkt, dass bi ues d’Boumgrenze bi 1800m isch, hei die hie no e subtropische Regewaud. Dr 2. Trip het ues i Suede vo Salta nach Cachi u Cafayate gfuehrt. Das isch no die abwechsligsrichere Tour gsi , zwar vor auem Canyons aber mit so wilde Forme u Farbe, isch ungloublich idruecklech gsi.

O schuesch het ues Salta sehr guet gfaue. Die Stadt, wo oeppe e haubi Million Iwohner het, besticht duerne schoene Mischig us aute Kolonialboute u moderne Hueser, emne schmucke Platz, emne Usflugshuegu mit Sicht ueber d’Stadt u em Usgangsviertel Balcarce, ere Fussgaengerzone mit Bars, Beize u Cluebs. Naebebi hets es 5*-Wellness-Hotel, wo mir ues ufem Velo im Fitnessrum oder bire Massage vo de Strapaze hei choenne erhole. Nachdem dr Nico ire Strass in Salta per Zuefau si Nachbar, dr Thoemu Wuergler, troffe het u mir mit ihm no i Balcarce gfeschtet hei, si mir witer nach San Pedro de Atacama, im Norde vo Chile (z’Land nid z’Gotteshus).