Salar de Uyuni (Bolivia)

Bolivien

In Salta heimer imene Touri Buero verno, dasses momentan in Bolivia zu Unruhe cho isch. Us daem Grund simmer naer drvo usgange, dassmer direkt vo Chile uf Peru goe, ohni Umweg ueber Bolivie. Doch ir Wueste vo San Pedro de Atacame (Chile) heimer ues speziel fuernae 4 tages tour vo San Pedro de Atacame nach Uyuni u zrueg mitemne Jeep erkundigt u da die Tour onid i die kritische Staedt geid, heimer ues nach langr Diskussion drzue entschlosse. Grundlag vor Diskussion isch nid d Sicherheit sondrn d’Hoechi xi... zum Vorweg naeh: mir si aui meh oder weniger gsund wieder zrueg cho... Doch uf derae Tour geid meh vo 2500M (San Pedro...) bis uf 5500M! Klar, uf derae Hoechi vrbringsch nid so viu zit, doch isch kenae vo ues jemaus hoecher xi...Eine vo dae drue Muskeltiere het sech de bereits 24Std. vor Abreise profilaktisch es Arzneimittel igworfe u die angere zwoei si de „nur“ uf Symptom bekaempfig us xi...

1. Tag
07.00 Abfahrt vo San Pedro de Atacame zur bolivianische Grenze. D Fahrt im Bus het opepe 90Min. duret u d Passkontrolle 5Min. Kurz vor dr Passkontroue isch de eim vo ues ufgfaue, dasser d Batterie vor DigiCam im Hostel vergesse het... Leider hets kes Zurueck gaeh, doch nachemne Bruce Lee Kick i Pneu vom Bus isch de dr Frust vo ihm schnaeu verfloge xi u mir hei ues au uf die Tour gfreud. Aschliessend isch de dr Bus i 6er Gruppene ufteilt worde, da maeh die holperigi Tour imene Jeep absolviert. Uesi Gruppe isch gmuetlech xi, doch am Schluss isch ues ds Israelische Paeerli chli uf d Naerve gange. Als 6di Person isch no zuefaelligerwies e Bernerin drbi xi. Nachem Fruehstueck ueber 4000M ischs de im Jeep am 11i (1std. Zitverschiebig) losgange. Am erschdae Dag isch kes Highlight ufem Program gstande, simmer doch 8Std. ueber Stock u Stei nach Uyuni (3800M) gfahre. Derd hetsech dae mitdae Profilaxe de mit Atemnot u sturmem Gring frueh ids Bett verabschiedet.

2. Tag
10.30 Abfahrt fuer ds eigendlaeche Hightlight vor Tour: Salar de Uyuni sowie La Isla Incahuasi (Kaktusinsel ir Salar de Uyuni). Dr Salar de Uyuni isch mit 12.000km2 oepe dr groeschd Salzsee uf dr Waeud u liegt im Suedweste vo Bolivie uf 3653M. Da sech e Salzkruste vo bis zu 30m ueberem See bildet, chame mitem Jeep drueber fahre. Das heimer de o gmachd u fasch dr ganz Dag ufem Salzsee u dr Kaktusinsel verbrachd. Ae Premiere hets bim zMittagesse gaeh. Nachdem mir Riis mit Fleisch gaesse hei, heimer usegfunde dasmer Lamafleisch gaesse hei, was es Novum fuer aui beduedet het... Grundsaetlzlech ischs aune bezueglech dr Hoechi guet gange, nur het dae mit dae Medis chum 10Meter choene loufe biser usser Atem isch xi.

3. Tag
07.00 Abfahrt fuer nae 8Std. Fahrt. Grosses heimer nid wuerk xe. Naebemne Arbol de Piedra (Baumstein) u dr Lagune Colorado simmer de i die beruechtigti Unterkunft uf 4300M gange. Beruechtigt deswegae, da es ke Heizig git u es ir Nachd bis zu -5Grad cha waerde. Nachere entueschende Portion Spaghetti simmer bereits am 8pm is Bett, ipackd mit Kappene, Odlo Unterwoesch (Dr eind het sini Odlo Unterhose am Vortag im Hostel la liege... – aber es isch nid dr glich mitdr Batterie....) u Schlafsack. Kalt het vo ues kenae gah, aber dusse isches de am Morge am 5i oepe -2Grad xi.

4. Tag
05.00 Abfahrt fuer d’ Geysers (= heiße Quelle, die ihr Wasser in regelmäßigen oder unregelmäßigen Abständen als Fontäne ausstößt) „Sol de manana“ gah z betrachte uf ueber 5500M. Aschliessend isches de mitem Jeep witer gange zumene Thermalbad, wosech aber kenae vo ues trout het, inezgumpe. Als Abschluss vor Tour heimer de no zwoei Lagunene (Laguna Blanca, Laguna Verde) choene bestune. Uf die 10i hets de zMorge gaeh, aschliessend isch dr Ruecktransport nach San Pedro de Atacama erfolgt. Wahrend dr geschdrige Nachd simmer vomene Erdbebe fruehmorgens ufgweckd worde, doch zum Glueck isch niemmerem oepis passiert. Huet abe geits de witer nach Peru (Arequipa), womer ues ids naechschde Abentuer stuerze.