Cusco - Machu Picchu

Nachdem mir es paar unvergesslichi Tage in Lima verbracht hei, si mir am 3.01.07 per Flugzeug nach Cuzco greist. D’Verwandte vom Nicolas hei ues scho im Vorfeld vor dr Fluggsellschaft gwarnt. Zerscht heimir stundelang im Flughafe vo Lima choenne warte, wueu dr Flughafe vo Cuzco waege schlaechtem Waetter zue sig (au angere Gsellschafte hei aber glich z’Cuzco choenne lande), womir de aendlech abgfloge si, hei mir waegem schlechte Waetter muesse abdreie u si de z’Arequipa glandet. Spaeter heimirs de aber aendlech gschafft u si in Cuzco, dr ehemalige Inka-Houptstadt uf 3416m, acho. Cuzco isch sehr schoen, suber, e chli chaut (isch haut o hoech obe) u bietet kulturell natuerlech enorm viu. Naebscht diverse Chile u Katedrale, emne wunderschoene Platz, Hueser mit verzierte Balkoen, hets vor auem um Cuzco historisch beduetendi Sehensweurdigkeite. Fuer e Machu Picchu ga zluege, heimir muesse nach Aguas Calientes ga. Bim Warte ufe Zug, wo nach Aguas Calientes fuehrt, het dr Nico wieder si Nachbar, dr Thoemu Wuergler troffe. D’Welt isch chli u aus Turischt bewegscht Di haut immer chli am gliche Ort. Vo Aguas Calientes us, simer am 5am ufgstande fuer ufe Boes ufe Macchu Picchu. Begleitet simer worde vomne 10-jaehrige Giu, wo i uesem Hotel usghuufe het, scho maengisch aus Chaski (das si Giele, wo dr Huegu grad abe seckle u versueche schneller zsi aus dr Touriboes – dass si si natuerlech o, schuesch gaebs vom Touri aeuae o ke Chole) ufem Huegu gsi isch, aber no nie d’Ruine gseh het. Mir hei ne iglade mit ues ufe zcho. Leider isch ds Waetter ufem Macchu Picchu vo Nebu u Raege praegt gsi,so dass mir nid die optimale Panorama-Fotis hei choenne schiesse. O dr nachglegnig Huegu, dr Huayna Picchu, heimir waege schlaechtem Waetter nid choenne bestige. Es isch trotzdaem faszinierend u sehr idruecklech gsi. Zruegg in Cuzco heimir no chli z’Nachtlebe gnosse u es paar noech bi Cuzco glaegeni Steihuefe bsuecht, wo zu Inkazyte wichtigi Zeremonie u Fescht gfieret si worde. Leider si di Ruine sehr spaerlech erhalte, da d’Spanier viu Steine fuere Bou vo de Chile u Katedrale brucht hei. Am 9. Januar simir de wieder zruegg nach Lima. Doert heimir mit Cousin u Cousine vom Nicolas no e luschtige Folklore-Abe inkl Tanzilage uf dr Buehni doerfe gniesse, bevor mir ues ufgmacht hei richtig Trujillo.